උපුල් සහ විපුල් දෙන්නා අයියා මලෝ. ඒත් දෙන්නම එ උසයි. එක මහතයි. එකම මුහුණුවරයි. වෙන් කරල හඳුනා ගන්න අමාරුයි. මේ උපුල්ය. මේ විපුල් ය, කියලා හඳුනා ගන්නට අම්මට තාත්තට වුණත් ලෙහෙසි නැහැ. මේ දෙන්නා නිවුන්නු. ඒ කියන්නේ නිවුන් සහෝදරයෝ. අයිය මල්ලිට වඩා වැඩිමහල් වෙන්නේ විනාඩි දෙක තුනකින් විතරයි. අයියගේ නම උපුල්. මල්ලිගේ නම විපුල්. දෙන්නම ඉගෙන ගන්න දක්ෂයි. ගුරු ගෙදර දී වැඩිය හපන්කම් පාන්නේ විපුල්. සෙල්ලම් පිටියෙදිත් හපනා. හේනේ කුඹුරේ වැඩවලදිත් අත් උදව්වට විපුල් කම්මැළි නෑ. අහල පහල උදවියට පුංචි පහේ උදව්වකට වුණත් ඉදිරිපත් වෙන්නේ විපුල්. ඒ නිසා කවුරුත් විපුල්ට ආදරය කළා. ඒත් කවුද විපුල්? කවුද උපුල්? විපුල්ගේ වැඩවලින් හොඳ නම ගන්න ඉදිරිපත් වුණේ උපුල්. ඉගෙනීමේ වැඩ හොඳට කළාට උපුල් කම්මැළියි. වැඩට පලට ශූර නෑ. ඒ වුණාට දෙන්නගෙ දඟකාරකමේ නම් අඩුවක් නෑ. අයියයි මල්ලියි අතර රණ්ඩු කෙළවරක් නෑ වෙලාවකට දෙන්නා හරි යාළුයි.