දෙ දිනකට පසු, පෙරවරු දහයට පමණ, විල්පෙපාර් මහතාගේ මැඳුර ඉදිරි පිට, මහා ජන කායක් රැස් වී සිටිනු දක්නා ලදි. ජෝපාබුර්ග් සේන් ඔනෝරේ වීථියේ සිට පෙපිනියෙර් විථීය දක්වා වූ මහා මාර්ගයෙහි අවමඟුල් රථ වලින් හා පුද්ගලික රථ වලින් සැදුණු දීර්ඝ රථ වාහන පෙරහරක් පෙළ ගැසී තිබිණ. මේ රථ වාහන අතර, ඉතා ඈතක සිට ආ බවක් පෙනුණා වූද අද්භූත ආකාරයකින් යුක්ත වූ ද කිසියම් රථයක් වූයේ ය. කළු පැහැ ගත්තා වුත් ආවරණය කරන ලද්දා වුත් වැගන් රථයක් හා සමාන වූ එය, මේ අවමඟුල සඳහා මුලින් ම වාගේ මෙහි පැමිණියක් වී ය. මේ පිළිබඳව කරන ලද විමසීමේ දී දැන ගන්නට ලැබුණේ, ඒ වැගන් රථයෙන් සේන්-මෙරාන් මාර්ක් විස් තුමාගේ මෘත දේහය ගෙනෙන ලද බවත් එක අවමඟුලකට සහභාගි වීම සඳහා එයත් සමග පැමිණි පිරිසට දැන් අවමඟුල් දෙකකට සහභාගි වන්නට සිදු වී තිබෙන බවත්ය. කෙසේ හෝ වේවා, පැමිණ සිටි ජන කාය අතිවිශාල වූ හ. XVIII වැනි ලුවී ගේත් X වැනි චාල්ස් ගේත් අත්‍යන්ත විශ්වාසී රාජ පාක්ෂිකයකු ව සිටි සේන්- මෙරාන් මාර්ක්ර්විස් තුමාට හිත මිතුරෝ මහත් රාශියක් සිටිය හ. මේ පිරිසට විපාර්ගේ මිතුරු පිරිස ද එක් වීමෙන් ඉතා දැවැන්ත මහා ජන සන්නිපාතයක් එ තැනට එක් රොක් වී සිටිනු දක්නට ලැබිණ.